काठमाण्डाैं , चैत्र २४
आगामी वैशाख १५ गते
इलाम क्षेत्र नम्बर २ र बझाङ क्षेत्र
नम्बर १ (क) मा हुने उपनिर्वाचनका लागि आज उम्मेदवारी दर्ता हुँदैछ ।
शनिबार बिहान १०
बजेदेखि बेलुका ५ बजेसम्म उम्मेदवारी दर्ताको समय निर्धारण गरिएको निर्वाचन आयोगले
जनाएको छ । आजै साँझ ५ बजेदेखि ६ बजेसम्ममा उम्मेदवारको सूची प्रकाशन गर्ने
कार्यतालिका छ ।
आयोगले उम्मेदवारको
विरोधमा उजुरी दिन भोलि बिहान १० बजेदेखि दिउँसो ३ बजेसम्मको समय निर्धारण गरेको छ
।
आयोगले आइतबार
अपराह्न ३ बजेदेखि चैत्र २६ गते बेलुका ५ बजेसम्ममा मनोनयनपत्र र उजुरी उपर
जाँचबुझ गर्ने र जाँचबुझपछि चैत्र २६ गते बेलुका ५ बजेदेखि ६ बजेसम्ममा मुख्य
निर्वाचन अधिकृतको कार्यालयमा उम्मेदवारको अन्तिम नामावली प्रकाशन गरिने आयोगले
जनाएको छ ।
उम्मेदवारहरूलाई
आफ्नो उम्मेदवारी फिर्ता लिन चैत २७ गते बिहान ९ बजेदेखि दिउँसो १ बजेसम्मको समय
निर्धारण गरिएको छ । सोही दिन उम्मेदवारको अन्तिम नामावली सार्वजनिक गरी चुनाव चिह्न प्रदान गरिने कार्यतालिका छ ।
इलाम २ बाट निर्वाचित नेकपा एमालेका नेता तथा
पूर्वसभामुख सुभाष नेम्बाङको निधन भएपछि उपनिर्वाचन हुन लागेको हो ।
त्यसैगरी बझाङ क्षेत्र नम्बर १ (क) मा कांग्रेसका
पृथ्वीबहादुर सिंहको निधन भएपछि उप निर्वाचन हुन लागेको हो ।
