काठमाडौं, माघ २३
कीर्तिपुर क्रिकेट रंगशालाको तोकिएको समयमा पूर्वाधार
निर्माण सम्पन्न हुने गरी तीव्रताका साथ काम गर्न शहरी विकास मन्त्रालयलाई प्रधानमन्त्री
केपी शर्मा ओलीले निर्देशन दिएका छन् ।
प्रधानमन्त्री तथा मन्त्रिपरिषद्को
कार्यालय, सिंहदरबारमा
मन्त्रालयका विषयमा आज ब्रिफिङ लिँदै प्रधानमन्त्री ओलीले कीर्तिपुर क्रिकेट
रंगशालालाई अन्तर्राष्ट्रियस्तरको बनाउने कार्यलाई छिटो अघि बढाउन निर्देशन दिएका
हुन् ।
प्रधानमन्त्री ओलीले पद बहालीका
क्रममा ३०० दिनभित्र उक्त रंगशालाको स्तरोन्नति गर्ने निर्णय लिएका थिए ।
रंगशालामा प्यारापिट र ल्फडलाइट निर्माणका लागि मन्त्रालयले आव्हान गरेको
बोलपत्रबमोजिम मूल्याङ्कको चरण सकिन लागेकाले चाँडै ठेक्का सम्झौता हुने
प्रधानमन्त्रीलाई अवगत गराइएको थियो ।
प्रधानमन्त्री ओलीले यस चरणको काम
जारी हुँदै अर्को चरणको निर्माणको कामका लागि सम्झौता प्रक्रिया अघि बढाउन पनि
आग्रह गरे ।
बैठकमा हरेक जेठ १५ मा संसद्मा बजेट
आउने हुँदा नयाँ आर्थिक वर्ष सुरु भए देखि नै तदारुकताका साथ बजेट र कार्यक्रमको
कार्यान्वयन हुनुपर्नेमा ढिलाइ हुने आम प्रवृत्तिप्रति चिन्ता प्रधानमन्त्री ओलीले
व्यक्त गरेका छन् ।
उपप्रधानमन्त्री एवं शहरी
विकासमन्त्री प्रकाशनमान सिंह र सम्बन्धित उच्चाधिकारीसमेतको सहभागितामा भएको
छलफलमा मन्त्रालयमातहत रहेका सङ्घीय संसद भवन, धरहरा, सङ्घीय मन्त्रीहरुको निवास, दमक व्यापारिक कम्ल्पेक्स, नेपाली सेनाको चण्डी दल, थापाथलीस्थित नेपाल राष्ट्र
बैँकको भवन निर्माण, हस्तान्तरण, सञ्चालन र मन्त्रालयको भावी
योजनाबारे अवगत गराइएको थियो ।
