काठमाण्डाै, भदौ ३१
इस्लाम धर्मावलम्बी आज धर्म प्रवर्तक
हजरत मोहम्मद पैगम्बरको १४९९ औँ जन्मजयन्ती मनाउँदैछन् ।
इस्लाम परम्पराको हिजरी संवत् अनुसार
रवि–उल–अव्वल महिनाको १२ तारिख धर्म प्रवर्तक हजरत मोहम्मद पैगम्बर सल्लाह अलै
वसल्लामको जन्मदिन मानिन्छ । इस्लाम धर्मवलम्बी यस महिनाको ९ तारिखदेखि नै उत्सवमय
वातावरणमा ‘मोहम्मद डे’ अर्थात् मोहम्मदको जन्मदिन मनाउँछन् ।
आज बस्तीबस्तीमा इस्लाम धर्मावलम्बीले
सद्भाव र्यालीको आयोजना गरेका छन् । सबैप्रति उच्च सम्मान, आपसी एकता, परोपकार र अहिंसा
यस पर्वको मुख्य सन्देश मानिन्छ । पर्वमा एकाबिहानै नुहाइधुवाइ गरेर विशेष नमाज
[प्रार्थना] गरेपछि इस्लाम धर्मावलम्बी अल्लाह [ईश्वर] को पुकारा गर्दै हजरत
मोहम्मद पैगम्बरका उपदेश सुन्छन् । ईद मिलाद नवी पनि भनिने यो पर्वमा कुरान सुन्ने, सामूहिक भोज खाने र
आपसमा पर्वको शुभकामना साटासाट गर्ने चलन छ ।
