बाँके असोज २९
बाँकेको खजुरा गाउँपालिकामा एक विद्यालयको बस पल्टिँदा एक विद्यार्थीको मृत्यु भएको छ ।खजुरा गाउँपालिका नजिकै रहेको दीपक बोर्डिङ स्कुलको बस दुर्घटना हुँदा खजुरा गाउँपालिका–६ का १२ वर्षीय ऐसव नेपालीको मृत्यु भएको इलाका प्रहरी कार्यालय धनौलीका प्रमुख प्रहरी निरीक्षक अशोक मल्लले बताउनुभयो ।
प्रहरी निरीक्षक मल्लका अनुसार आज साँझ विद्यायलबाट घर पु¥याउने क्रममा खजुराबाट सिमलघारीतर्फ जाँदै गरेको ना ४ ख ६५१ नम्बरको बसको स्टेरिङ फेल भएर पुलबाट बस पल्टिँदा विद्यार्थी नेपालीको मृत्यु भएको हो । बसमा करिब ४० विद्यार्थी सवार थिए । तीमध्ये ३० सामान्य घाइते भएका छन् । घाइते भएकालाई स्थानीय अस्पतालतमा उपचार गराई घर फर्काइएको छ । एक गम्भीर घाइतेलाई नेपालगञ्जस्थित भेरी अस्पतालमा भर्ना गरिएको प्रहरीले जनाएको छ ।
२८ असोज २०८०, सोमबार ०९:४२ मा प्रकाशित
