काठमाण्डाैं, साउन १२
अमेरिकी उपराष्ट्रपति कमला ह्यारिसले
नोभेम्बरमा हुने अमेरिकी राष्ट्रपति चुनावका निम्ति आफ्नो उमेदवारीको आधिकारिक
घोषणा गरेकी छन् ।
कमलाले आफ्नो पोस्टमा भनेकी छन्, “आज मैले संयुक्त
राज्य अमेरिकाको राष्ट्रपति पदका निम्ति आधिकारिक रूपमा मेरो उमेदवारी घोषणा गर्ने
फारामहरूमा हस्ताक्षर गरेको छु । म हरेक मत कमाउन कडा मिहिनेत गर्नेछु र
नोभेम्बरमा हाम्रो जित हुनेछ,”
५ नोभेम्बरमा हुने अमेरिकी राष्ट्रपति चुनावमा डेमोर्क्याटिक
पार्टीले आफ्नो उमेदवारका रूपमा उपराष्ट्रपति कमलालाई समर्थन गर्ने जनाएको छ ।
यस अघि, शुक्रबार पूर्वअमेरिकी राष्ट्रपति बाराक ओबामाले अमेरिकी
राष्ट्रपति पदका निम्ति कमलालाई सार्वजनिक रूपमा समर्थन गरेका थिए । ओबामाले आफू र
अमेरिकाकी पूर्वप्रथम महिला मिशेल ओबामाले नोभेम्बरमा हुने राष्ट्रपतीय निर्वाचनमा
कमलाको जित निश्चित गर्न सक्दो सहयोग गर्ने बताए ।
यस
हप्ताको सुरुमा ओभल अफिसबाट राष्ट्रलाई सम्बोधन गर्दै अमेरिकी राष्ट्रपति जो
बाइडेनले कमला ह्यारिसलाई ‘महान् उपराष्ट्रपति’ भनेका थिए । “उहाँ अनुभवी
हुनुहुन्छ र राष्ट्रपति पदका लागि सक्षम हुनुहुन्छ,” बाइडेनले भनेका थिए ।
ह्वाइट हाउसका प्रेससचिव करिन जिन पियरेले डेमोर्क्याटिक पार्टीबाट
राष्ट्रपति उमेदवारका निम्ति कमलाभन्दा योग्य अरू नभएको बताएका थिए ।
