सुनसरी, साउन २
कोशी प्रदेशमा प्राकृतिक विपदमा
परेर एक बर्षमा ७७ जनाकाे मृत्यु भएको छ । २सय ७७ जना घाइते
भएका छन् । कोशी प्रदेश प्रहरी कार्यालय विराटनगरका अनुसार बाढी, पहिरो, चट्याङ, आगलागी, हावाहुरी र जङ्गली जनावरको
आक्रमणमा परेर सो सङ्ख्यामा मृत्यु तथा घाइते भएका हुन् ।
प्रदेश प्रहरी प्रवक्ता प्रहरी वरिष्ठ उपरीक्षक भीमबहादुर दाहालका अनुसार एक वर्षमा एक हजार ७ सय ३१ स्थानमा आगलागी
भएको भने ४ सय ९६ स्थानमा पहिरो, २ सय ५३ स्थानमा जङ्गली जनावरको आक्रमण, १ सय ८४ हावाहुरी, १ सय १७ स्थानमा बाढी र ८७ स्थानमा
चट्याङले मानवीय क्षति गरेको छ ।
दाहालका अनुसार बाढीका कारण २२ जनाको मृत्यु भएको छ
। २४ जना घाइते भएका छन्। यसैगरी आगलागीमा परेर २० जनाको मृत्यु भएको छ भने , चट्याङ लागेर १३ जनाको मृत्यु भएको
छ । यस्तै जङ्गली जनावरको आक्रमणबाट १३ जनाको मृत्यु भएको छ भने पहिरोमा परी ९
जनाको मृत्यु भएको बताइएको छ ।
यसैगरी पहिरोमा परेर २०, चट्याङले लागेर ३६जना आगलागीमा परी १सय३४जना , हावाहुरीका कारण ६ जना तथा
जङ्गली जनावरको आक्रमणबाट ५७ जना घाइते भएको तथ्याङ्क रहेको छ । यसैगरी प्राकृतिक
विपद्का कारण दुई हजार २ सय ७४ घर परिवार प्रभावित भएका छन् ।
